Autor: wfilarlug

A tempada actual da Real Filharmonía de Galicia, que ten como lema Inconformistas, tiña que dedicar un lugar salientable a Beethoven, quen asumiu enormes riscos construtivos e estéticos, renovando tanto a linguaxe musical como o sentido ético da existencia. Do seu ballet As criaturas de Prometeo só se conserva a música, na que a abertura é unha parte esencial. Inconformista foi tamén Marianne von Martinez, quen, a pesar do seu recoñecemento como compositora, nunca puido ocupar un posto profesional como o de Konzertmeister, cargo que si ostentou o seu compatriota Mozart. De ambos soarán os seus Concertos para piano en la maior, tan extraordinarios como diferentes. Vienés como von Martinez, Schubert compuxo a Sinfonía núm. 2 en 1815, unha obra na que utiliza material do Prometeo de Beethoven e na que amosa todo o seu xenio creativo, a pesar do cal ningunhas das súas nove sinfonías foron estreadas en vida do compositor.

De orixe española e alemá, Marianne von Martínez ou Mariana Martínez, naceu en Viena o 4 de maio de 1744. O seu pai, Nicolo Martínez, nacera en Nápoles pero tiña ascendencia española. A súa nai, Maria Theresia, era de orixe alemá. A principios da década de 1730, a parella instalouse en Viena, onde Nicolo foi contratado como mestre de cámara para o nuncio papal na capital austríaca. No edificio no que Mariana naceu e creceu na Michelerplatz de Viena, uns ilustres veciños descubrirían e potenciarían o seu talento para a arte. Tanto o poeta Pietro Trapassi, coñecido como Metastasio, como os compositores Nicola Porpora e un xove Joseph Haydn, ensinaron á pequena Marianne a tocar e compoñer. Tanto estes ilustres inquilinos como outros compositores reputados da cidade imperial fixeron da rapaza unha intérprete famosa no seu tempo que axiña empezou a deleitar aos membros da corte sendo unha das favoritas da emperatriz María Teresa.

En 1773 era admitida na Academia Filharmónica de Bolonia. Ao longo da súa vida, Marianne compuxo sinfonías, sonatas, concertos e pezas relixiosas.

Cando en 1782 faleceu Metastasio, o poeta deixoulles a ela e á súa irmá unha ampla herdanza que lles permitiu vivir folgadamente o resto dos seus días. O seu fogar converteuse en centro de reunión de artistas no que se deron cita compositores da altura de Mozart e Beethoven. E por suposto Haydn, o seu mestre e admirador que a alcumou a “pequena española”.

Nil Venditti

A xove directora turco-italiana Nil Venditti foi a principal directora invitada da Orquestra da Toscana e nesta tempada directora invitada principal da  Royal Northern Sinfonia e colabora estreitamente coa Filharmónica dos Países Baixos, a Orquestra Nacional do Capitolio de Toulouse e o Ensemble Ancyra de Ankara.

Dirixiu á Orquestra Nacional de Bordeos-Aquitania, así como coa Real Filharmónica de Liverpool, a Filharmónica de Bruxelas, a Sinfónica de Lucerna, a Nacional de Lille, a Orquestra Haydn de Bolzano e Trento e I Musici de Montreal. Outro dos seus debuts máis notables foi en novembro de 2019, coa Camerata de Salzburgo dirixindo a Fazil Say interpretando as súas propias obras.

Na tempada 2024/25 debutará coa Orquestra Sinfónica da Radio Finlandesa, a Orquestra Filharmónica da BBC, a Filharmónica do Ártico e a Filharmónica Borusan de Istambul, así como coas orquestras de Aalborg, Tenerife, Baleares, Wuppertal e Bochum. Regresa á Orquestra de Cámara de Stuttgart para concertos de xira no Wiener Musikverein e en Bregenz, así como coa Orquestra Nacional de Gales da BBC, a Royal Philharmonic Orchestra, a Orquestra Sinfónica da BBC, a Filharmónica Alemá de Cámara de Bremen, a Sinfónica de Helsingborg e a Sinfónica de Hamburgo.

Venditti formouse na Escola das Artes de Zúric, na Academia de Dirección do Festival de Pärnu, con Paavo e Neeme Järvi, e na Academia de Gstaad. Recibiu o primeiro premio no Concurso para Xoves Músicos Claudio Abbado en 2015 e obtivo dous premios nas Xuventudes Musicais de Bucarest en 2017.

Noelia Rodiles, piano.

A traxectoria musical de Noelia Rodiles inclúe concertos nas principais salas de España, como o Auditorio Nacional de Música, Teatro Real, Auditorio de Zaragoza, Auditori de Barcelona, Palau da Música Catalá, Fundación Juan March, Auditorium de Palma ou Teatros do Canal, e en ciclos e festivais como Xoves Intérpretes da Fundación Scherzo, Schubertíada de Vilabertrán, Festival de Música e Danza de Granada, Festival Internacional da Arte Sacra de Madrid ou a Quincena Musical Donostiarra, así como en Alemaña, Italia, Suíza, Francia, México ou Polonia.

A súa calidade musical foi recoñecida en concursos nacionais e internacionais de piano como o Rotary Club de Palma de Mallorca e o Ricard Viñes de Lleida ou o Primeiro premio, por unanimidade, e os tres premios especiais recibidos no Concurso Nacional de Piano Cidade de Albacete. Obtivo tamén o primeiro premio no Concurso Permanente de Xoves Intérpretes de Xuventudes Musicais de España. Formada nos conservatorios de Avilés, Madrid e Berlín con Ana Serrano, Ana Guijarro e Galina Iwanzowa, perfeccionou os seus estudos na Escola Superior de Música Raíña Sofía de Madrid con Dimitri Bashkirov e Claudio Martínez Mehner.

Recibiu clases maxistrais de Daniel Barenboim, Joaquín Achúcarro, Salomon Mikowski, Joaquín Soriano, Galina Eguiazarova, Elisso Virsaladze e Josep M. Colom entre outros.