Autor: wfilarlug

Juan Ferrer, clarinete
Raúl Mirás, violoncello
Alicia González, piano

Programa

• L.v. Beethoven: Trío para Clarinete, cello e piano
• N. Rota: Trío para Clarinete, cello e piano
• J. Brahms: Trío para Clarinete, cello e piano

 

Juan Ferrer

Juan Ferrer (Valencia) é un dos clarinetistas máis polifacéticos e destacados da súa xeración. É o primeiro español en formar parte do xurado de prestixiosos concursos internacionais en Europa, Asia e América. Dende a tempada 2017-2018 é profesor invitado da Fundación Simón Bolívar (El Sistema).

Como solista actuou con destacadas orquestras sinfónicas españolas e internacionais, así como con recoñecidas bandas sinfónicas europeas. É artista das marcas Buffet-Crampon e Vandoren, e dende 1994 ocupa o posto de clarinete principal da Orquestra Sinfónica de Galicia.

Ao longo da súa carreira traballou con algúns dos directores máis importantes do panorama internacional, entre eles Gustavo Dudamel, Lorin Maazel, Daniel Harding e Sir Neville Marriner, entre moitos outros.

Raúl Mirás

Cello principal da Orquestra Sinfónica de Galicia dende 2020, Raúl desenvolve unha ampla e recoñecida traxectoria artística, actuando como solista de orquestras como a Sinfónica de Tenerife, OFGC, Les Arts, OBC, Ciudad de Granada e OSCyL, e colaborando con formacións como a Mahler Chamber Orchestra, Philharmonia Orchestra ou a Deutsche Kammerphilharmonie Bremen, entre outras.

Formado en Musikene e en centros de referencia europeos como a Musik-Akademie Basel e a Hochschule für Musik Rostock, foi membro da JONDE, a Gustav Mahler Jugendorchester e academista da Rundfunk-Sinfonieorchester Berlin.

Mantén unha intensa actividade como músico de cámara e estende o seu compromiso musical ao ámbito pedagóxico, impartindo clases e clases maxistrais, así como colaborando con diferentes orquestras xoves.

 Alicia González

Natural de Lalín (Pontevedra), Alicia inicia a súa formación musical aos sete anos en piano e violín. Continúa os seus estudos na Escola de Música de Barcelona e, posteriormente, no Brabants Conservatorium de Tilburg (Holanda), formándose con mestres como Albert Attenelle, Ton Demmers, Jan Wijn e Eugen Indjic.

Foi galardoada con numerosos premios nacionais e internacionais dende unha idade temperá, así como con diversas distincións académicas.

Desenvolve un intenso labor como pianista acompañante e de música de cámara, colaborando en clases maxistrais con destacados solistas e traballando adoito con orquestras como a Orquestra Sinfónica de Galicia, a Orquestra Ciudad de Granada e a Sinfónica de Bilbao, baixo a dirección de prestixiosos mestres. Ofreceu recitais en diversos países e importantes escenarios europeos e actuou como solista con varias orquestras e realizou gravacións para RNE.

Actualmente é pianista acompañante do Conservatorio Superior de Música da Coruña, compaxinando este labor coa súa actividade concertística como solista e músico de cámara.

 

Cuarteto Brétema

Mario Rabanal, violín
Sara León, viola
Nuria Pons, violoncello
Iván Carpintero, piano

• A. Scriabin: Sonata para piano nº 2, Op. 19
• F. Schubert: Trío de cordas en si bemol maior, D. 471
• R. Schumann: Cuarteto con piano en Mi bemol maior

 

O Cuarteto Brétema nace do encontro de catro mozos músicos formados na Escola Superior de Música de Cataluña, unidos polo desexo de compartir a música de cámara como un espazo de diálogo e emoción. Ao longo destes anos traballaron con varios membros do Cuarteto Casals como Vera Martínez Mehner e os irmáns Abel e Arnau Tomás, e actualmente estudan baixo a guía de Cristina Cordero, o seu violista. Deles aprenderon a importancia da escoita, a claridade e a honestidade musical á hora de explorar e comprender novas obras de música de cámara.

 

Mario Rabanal Freire, violín

Nacido en Lugo en 2004, estuda actualmente na Escola Superior de Música de Cataluña co profesor Yuri Volguin. Realizou os seus estudos profesionais no Conservatorio Profesional de Música de Lugo, finalizándoos con Matrícula de Honra e obtendo o Premio Extraordinario de Ensinanzas Artísticas da Xunta de Galicia. Formou parte da Orquestra Xove da Sinfónica de Galicia e colaborou coa Orquestra Sinfónica de Galicia baixo a dirección de Roberto González-Monjas e Fernando Briones.

Recentemente recibiu a bolsa de estudos da Fundación Anna Riera 2025-2026.

 

Sara León Pardo, viola

Nacida en Cuenca en 2005, comezou os seus estudos musicais de viola no Conservatorio Profesional de Música Pedro Aranaz de Cuenca aos 8 anos. Recibiu clases particulares de Ashan Pillai, Cristina Cordero, Jonathan Brown, Laure Gaudron, Wenting Kang, Thomas Riebl…

Actualmente cursa o grao superior na Escola Superior de Música de Catalunya (ESMUC) baixo a tutela de Anna Puig. Tamén é membro activo da Jove Orquestra Nacional de Catalunya (JONC). Foi dirixida por directores de renome como Gustavo Dudamel, e en setembro de 2024, foi academista na Franz Schubert Philarmonie Orchestra, acompañando a solistas como Maxim Vengerov, Daishin Kashimoto…

 

Nuria Pons Orfila, violoncello

Nacida en Mahón en 2004, é unha violonchelista menorquina que actualmente cursa os estudos superiores de violonchelo na Escuela Superior de Música de Cataluña (ESMUC) co profesor Cristoforo Pestalozzi. É membro titular da Joven Orquesta Nacional de Cataluña (JONC), dirixida por Manel Valdivieso, onde recibiu clases de músicos da BandArt e da Mahler Chamber Orchestra (MCO).

Actuou como solista coa Orquestra Filharmónica do Ateneo de Mahón e participou en diversas galas e proxectos de cámara, entre eles a Gala Sine Dolore.

Forma parte da orquestra do Coro Illa de Menorca dende os seus inicios e foi membro de varias orquestras xoves como a EOIB, a JOCG e a JOSV, onde foi academista durante un ano, traballando con directores como Xavier Puig, Isabel Rubio e Andrés Salado.

 

Iván Carpintero Vivar, piano

 Nacido en Santander en 2005, iniciou os seus estudos de piano aos cinco anos. Cursa o Máster en Interpretación de piano na ESMUC, onde tamén realizou o grao superior tras ser primeiro nas probas de acceso aos 16 anos. Gañou primeiros premios en concursos internacionais como o de Linares, Marisa Montiel, o Monegrarte e o de Sevilla Julio García Casas, ademais doutros galardóns nacionais e internacionais.

Bolseiro por Erasmus na GO Kunstakademie Gent, recibiu clases de mestres como R. Akamatsu, A. Fiderkiewicz, G. Díaz Jerez ou D. Lossev. Deu o seu primeiro recital aos sete anos e actuou en numerosos espazos incluíndo a Casa de Rusia e a Sala Casyc.