2 de xuño 2022

XLIX Semana de Música do Corpus – Festival Cidade de Lugo

Xoves, 2 de xuño de 2022  – Círculo das Artes de Lugo, 20:30 h

 

Patagonia Express Trío

 

 
 
 
 
 

 

Gustavo Beytelmann, piano

Óscar Bohórquez, violín

Claudio Bohórquez, violonchelo

 

Piazzolla Ruta 100

Programa:

Astor Piazzolla (1921-1992)

  • Muerte del Angel
  • Le Grand Tango

Gustavo Beytelmann (1945)

  • Ofrenda
  • Balada 
  • Tango

Duke Ellington (1899-1974) / Arr. Beytelmann

  • Caravan

Astor Piazzolla (1921-1992)

  • Milonga en Re
  • Cuatro Estaciones Porteñas

 


Piazzolla Ruta 100

 Escandalosa, poderosa e única: a música de Piazzolla é moi versátil, profundamente arraigada na tradición do tango e, sen embargo, sempre impulsada pola curiosidade e a busca da modernidade. As súas obras son complexas e esixentes e reflicten máis que ningún outro compositor do seu tempo a especial linguaxe musical desa época. A súa música non pode ser encadrada como clásica ou popular: As influenzas do jazz e a música brasileira mestúranse co folclore dos anos 50 e 60; o tango alíñase co contrapunto bachiano, o ritmo converxe con pasaxes profundamente líricas. Esa é a esencia e a forza desta música, rebordante de ardor e paixón, e por momentos dunha profunda melancolía, unha fusión perfecta entre a tradición e a vangarda, unha revolución musical coñecida como novo tango.

A diversidade do estilo de Piazzolla reflíctese no programa deste concerto con obras como Le Grand Tango, a Muerte del ángel, Milonga en Re e as Cuatro Estaciones Porteñas.

Gustavo Beytelmann acompañou a Piazzolla na súa xira europea de 1977 e na súa lendaria presentación no Olympia de París e gozou dunha profunda e duradeira amizade co compositor, agora apadriña a dous rapaces, unha novísima xeración de excelentes músicos, os irmáns Óscar e Claudio Bohórquez, de pai peruano e nai uruguaia, ambos os dous tamén músicos, el fagotista, ela pianista. O Expreso da Patagonia, que dá nome ao trío, é unha liña ferroviaria de vía estreita duns 400 quilómetros de lonxitude ao longo dos Andes. É un motivo romántico para os poetas e escritores. Está considerada unha das rutas máis belas do mundo.

Beytelmann dedicou aos irmáns Óscar e Claudio Bohórquez as obras en dúo Balada e Tango, que respiran a linguaxe musical de Astor Piazzolla, mentres que o seu arranxo para trío con piano de Caravan de Duke Ellington nos traslada a Nova York, onde Piazzolla pasou a súa infancia e xuventude.

Compuxo o seu trío de piano Ofrenda en 1992 ao saber da morte de Piazzolla. É un acto de homenaxe que, como todo o programa, pretende expresar unha profunda admiración e reverencia por esta lenda do tango infatigable e desenfreada.

 

PATAGONIA EXPRESS TRIO

 Patagonia Express Trío está formado polos irmáns Óscar e Claudio Bohórquez (violín e violonchelo) e o lendario pianista Gustavo Beytelmann, compañeiro de xiras de Astor Piazzolla nos anos 70, co obxectivo de presentar unha interpretación auténtica da obra do gran mestre do tango novo.

En 2021 Patagonia Express Trío publicou o seu primeiro disco Piazzolla Ruta 100 co prestixioso selo Berlin Classics con motivo da conmemoración dos cen anos do nacemento de Astor Piazzolla (1921 – 1992).

Patagonia Express Trío presentouse no Festival Internacional de Música de Cámara de Salon de Provence, no Piano Salon Christophori Berlín, na Filharmonía de Berlín e na Maison de la Radio París, entre outros.

O disco Piazzolla Ruta 100 inclúe coñecidas obras de Astor Piazzolla e composicións propias de Gustavo Beytelmann. Como director artístico do programa Codarts de Tango Arxentino da Universidade das Artes de Rotterdam, Beytelmann é unha das maiores autoridades internacionais no tango actual, cuxas composicións e arranxos foron interpretados entre outros por Gotan Project e a Kremerata Baltica.

Nacidos en Alemaña de orixe uruguaia e peruana, os irmáns Bohórquez actuaron como solistas e músicos de cámara en destacados teatros e festivais como a Alte Oper Frankfurt, Filharmonía do Elba de Hamburgo, Gewandhaus Leipzig, Filharmonía de Berlín, Jerusalem International Chamber Music Festival, Kronberg Festival e o Festival de Música de Dresde, entre outros. Ademais, traballaron con directores da altura de Daniel Barenboim, Christoph Eschenbach, Sir Neville Marriner ou Krzysztof Penderecki.

Óscar toca un violín Guarneri del Gesú do ano 1729, e Claudio, que dende 2016 exerce como profesor na Hochschule für Musik Hanns Eisler de Berlín, toca un violonchelo de Giovanni Battista Rogeri.