Ensemble 1700 – 25 de maio

XLVI Semana de Música do Corpus – Festival Cidade de Lugo

Venres, 25 de maio de 2018  – Círculo das Artes de Lugo, 20:30 h

 

Ensemble 1700: Dorothee Oberlinger, Dmitry Sinkovsky, Vittorio Ghielmi & Olga Watts

 Dorothee Oberlinger, frautas e dirección 

Vittorio Ghielmi, viola da gamba

Dmitry Sinkovsky, violín e contratenor

Olga Watts, clave

 

 

 

 

    

Viaggio musicale

Georg Philipp Telemann (1681-1767)

Trío Sonata en Re menor TWV 42:d10

Georg Philipp Telemann (1681-1767)

Dúo en Si maior TWV 40:111 de “Der getreue Music-Meister”

Arcangelo Corelli (1653-1713)

Sonata en Fa maior, op. 5 Nr.10 (trancr. William Babell)

Georg Friedrich Händel (1685-1759)

Mi palpita il cor, Cantata HWV 132c

Antonio Caldara (c. 1671-1736)

Ciaccona en Si M (Venecia 1699)

****

Georg Philipp Telemann (1681-1767)

Fantasía en Sol menor TWV 40:32 (viola de gamba)

Johann Sebastian Bach (1685-1750)

Trío sonata Nr. 3 BWV 527 en Sol menor (orixinalmente Mi menor)

Antonio Vivaldi (1678-1741)

Sol da te mio dolce amore de Orlando furioso

Antonio Vivaldi (1678-1741)

La Follia op. 1 Nr. 12 RV 63 (versión Sol menor)

 

 

Dorothee Oberlinger

Dorothee Oberlinger formouse como profesora de música e graduouse en Filoloxía Alemá antes de estudar frauta doce en Colonia, Ámsterdan e Milán.

Tras gañar o primeiro premio Moeck/SRP Solo Recorder Competition en Londres, fixo o seu debut profesional no Wigmore Hall en 1997.

Entre os seus galardóns destacan o Diapason D’Or e varios Echo Klassik, entre eles o de Mellor instrumentista do ano. Fixo o seu exitoso debut como directora de orquestra en 2011.

Foi solista en salas de concertos xunto a moitos dos máis distinguidos ensembles barrocos e orquestras, como os Sonatori de la Gioiosa Marca, Musica Antiqua Köln, Akademie für Alte Musik Berlin, Academy of Ancient Music, London Baroque, Melante, L‘Arte del Mondo, Al Ayre Español, Zefiro…

Oberlinger abrangue múltiples proxectos nos que adoita traballar con destacados músicos como Reinhard Goebel, Giovanni Antonini, Vittorio e Lorenzo Ghielmi, Luca Pianca, Rachel Podger, Giuliano Carmignola, Andreas Scholl, Dimitry Sinkosvky, Sandrine Piau e Max Emanuel Cencic.

En 2002 fundou o Ensemble 1700, grupo especializado en música de cámara dos séculos XVII e XVIII. Dende entón traballou con varias figuras notorias do mundo da música antiga en numerosos proxectos que inclúen concertos e gravacións.

Dende 2004 Dorothee Oberlinger ensina na Universität Mozarteum Salzburg, onde exerce tamén o cargo de directora do Instituto de Música Antiga. Dende 2009 é directora do Arolser Baroque Festival.

Ensemble 1700

Dorothee Oberlinger funda o Ensemble 1700 en Colonia no ano 2002 especializándose na música de cámara europea dos séculos XVII e XVIII. Fundaméntase tanto en bases musicolóxicas como na práctica instrumental, e unidas á máis alta habilidade técnica, o ensemble produciu gravacións en CD, así como programas de concerto recibidos de maneira entusiasta tanto pola prensa como polo gran público.

As súas aparicións nas salas de concertos máis importantes (incluíndo Konzerthaus Vienna, ou Philharmonie Cologne) e en importantes festivais europeos (Days of Early Music en Herne e Resonanzen en Viena) foron extremadamente exitosas, contribuíndo a fortalecer a reputación deste xove ensemble.

Entre as gravacións máis recentes cabe destacar un traballo sobre G. P. Telemann (2008, Sony/DHM) que foi celebrado como unha gravación de referencia “con peso e brío” (Der Spiegel).

Ademais de aos membros habituais do ensemble, Dorothee Oberlinger invita de maneira habitual a reputados instrumentistas para participar en concertos e gravacións. Destas colaboracións xurdiron proxectos como a gravación do CD German flute concertos en 2010, con Reinhard Goebel á dirección. Este traballo foi engadido á colección Os mellores CDs de Clásica editado por Kultur Spiegel. Outras gravacións inclúen os CDs Barrocos Franceses e Telemann: Suite en La menor e Dobres Concertos.

Dmitry Sinkovsky

É difícil encontrar un músico máis polifacético que Dmitry Sinkovsky. A súa visión e concepto de facer música basease nun profundo estudo como violinista virtuoso, director e cantante. Foi premiado en 2006 na Bach Competition, en 2008 na Musica Antiqua Competition e en Romanus Weichlein en 2009. Actuou por todo o mundo con agrupacións como Concerto Köln, Il Giardino Armonico, Helsinki Baroque Orchestra, Orquesta Barroca de Sevilla ou Australian Brandenburg Orchestra.

Durante a tempada 2012-2013, Dmitry foi director invitado de Il Complesso Barocco, acompañando á gran mezzosoprano Joyce DiDonato na súa xira de concertos Drama Queens con 30 actuacións nas principais salas de concertos de Europa, Estados Unidos de América e Asia. Esa foi a primeira vez que Dmitry se presentou como director ante unha grande audiencia, seguindo o exemplo do seu mestre e colega o gran musicólogo Alan Curtis.

Dmitry Sinkovsky segue tendo unha gran demanda como director de orquestra, cunha ampla actuación en Europa, Rusia, Canadá, Asia, Australia e Estados Unidos de América. Dirixe o conxunto La Voce Strumentale, que fundou en Moscova en 2011.

Na tempada 2017-2018, Dmitry é director barroco residente na Orquestra Sinfónica de Seattle, así como na Orquestra Barroca de Helsinki, a Sinfonía de Dubrovnik, Il Pomod`oro e a Orquestra Brock. Ademais, colabora coa Orquestra Nacional de España, Kremerata Baltica, Il Giardino Armonico, Sinfonietta Riga, a Orquestra de Cámara de Klaipeda e a Orquestra Musica Viva.

Vittorio Ghielmi

Músico italiano (viola da gamba), director e compositor, profesor no Mozarteum de Salzburg. Comparado pola crítica con Pablo Casals e Jasha Heifetz (Diapason) abriu camiño a unha imaxe sonora diferente do repertorio antigo e da viola da gamba.

Como solista e director actuou nas máis prestixiosas salas do mundo acompañado de importantes orquestras modernas e barrocas (Los Angeles Philarmonic Orchestra, London Philarmonia, Concertverein-Wien, Staatskapelle Halle, Il Giardino Armonico, Freiburger Baroque Orchestra, Akademie Alte Musik Berlin etc.).

Dende 2007 a 2011 foi asistente de Riccardo Muti no Festival de Salzburgo. En 2007 concibe e dirixe o espectáculo Membra Jesu Nostri con dirección do cineasta estadounidense Marc Reshovsky e co Coro Rilke ensemblen (G. Erikson, Suecia) para o Festival de Música Relixiosa de Cuenca. Foi artista en residencia en moitos festivais: entre eles Musikfest Stuttgart 2010, Segovia festival 2011, Bozar Bruxelles 2011. O seu ensemble Il Suonar Parlante, dedícase á investigación do repertorio antigo e tamén á formación dunha nova realidade musical: colaborou con jazzistas como Kenny Wheeler, Uri Caine, Paolo Fresu, Don Byron, Markus Stockhausen, E. Rejiseger, cantautores como Vinicio Capossela, coa cantaora flamenca Carmen Linares e músicos de tradición extraeuropea como Ensemble Kaboul. 

Toca unha viola de Michel Colichon, París 1688.