23 de maio 2024

51 Semana de Música do Corpus – Festival Cidade de Lugo

Xoves, 23 de maio de 2023  – Círculo das Artes de Lugo, 20:30 h

 

Elisabeth Hetherington, soprano

Pérgamo Ensemble

Mater Misericordiae                                                                                                                                                                                                                                                                                                                                                                                         

 

 
 

 

 

 

Elisabeth Hetherington, soprano

Pérgamo Ensemble

Kinga Ujszászi, violín barroco

Daniel Ramírez, óboe barroco

Guillermo Turina, violonchelo barroco

Eva del Campo, órgano

 

Programa: 

Georg Philipp Telemann (1681-1767)

Trío Sonata No. 3 TWV 42:g5

Zeug, ohn Verzug, in deinen Nöten. Cantata TWV 1:1728

 

Jan Dimas Zelenka (1679-1745)

Sonata ZWV 181

Salve Regina ZWV 135

 


 

Elisabeth Hetherington

Dende que se trasladou aos Países Baixos, a soprano Elisabeth Hetherington consolidouse como unha destacada intérprete da música antiga, contemporánea e moderna en toda Europa. Elisabeth foi eloxiada pola súa «…personalidade intrépida e poderosa, así como pola súa técnica impecable e a súa impresionante presentación» (NRC, 2020) e «graza virtuosa, dinámica sofisticada e colores sutís… fermosamente lírica, destaca a fraxilidade do seu timbre…” (Revista Place de l’Opera, 2020). Logrando salvar sen esforzo a brecha entre a música antiga e a contemporánea, estreou e gravou numerosos traballos nos Países Baixos, Bélxica, Noruega e Estonia.

Elisabeth é unha apaixonada defensora da interpretación multidisciplinar. Coa compañía de danza moderna Leineroebana, desenvolveu Soas. Inspirándose na súa formación como bailarina, Soas é unha fusión de música e poesía, así como de canto e danza, na que demostra o ben que conviven nela o movemento e o canto (Theaterkrant, 2019). Creou papeis operísticos con compañías como Holland Opera, Holland Baroque e Opera Zuid, incluíndo roles como Senta (De Vliegende Hollander, Holland Opera 2021), The Woman (Bonsai Gardens, Opera Zuid 2020), Belina (Dido & Aeneas, Holland Baroque 2021), Susanna (Divorce of Fígaro, Ópera de Holanda 2022) e Cordelia (King Lear, Ópera de Holanda 2019) – das que se dixo “…cunha voz de soprano prateada e pura, ela é a estrela da noite e con razón recibe a maioría dos aplausos” (Theatrekrant 2019). Fundou o conxunto Duo Serenissima co que tivo a oportunidade de crear programas presentándose en moitos festivais e ciclos de concertos en todo o mundo. A capacidade de Elisabeth para programar recitais e concertos atrevidos e esixentes para conxuntos e festivais de renome mundial, valeulle o eloxio de ser capaz de «mostrar como sona un gran futuro na música» (NRC, 2021).

Por outro lado, o labor de Elisabeth tivo gran repercusión pola súa investigación no campo da pronunciación orixinal do inglés isabelino. Converteuse nunha solicitada experta, ofrecendo clases maxistrais en conservatorios dos Países Baixos, ademais de aparecer como conferenciante no Festival Oude Muziek de Utrecht. No ano 2020 recibiu o premio Dutch Classical Talent Award e gravou o seu álbum debut a través da axencia de radiodifusión holandesa Avrotros. Continúa facendo aparicións frecuentes nas emisoras de radio e televisión dos Países Baixos. Elisabeth completou a súa licenciatura en canto na Universidade de Toronto, e graduouse cum laude da mestría en Interpretación Histórica no Conservatorium van Amsterdam, institución na que traballa regularmente como profesora invitada.

Pérgamo Ensemble

Galardoados en xullo de 2019 co Gran Premio do Xurado do VIII concurso de Música Antiga de Xixón, Pérgamo Ensemble comezou a ofrecer os seus primeiros concertos no ano 2016. Dende entón realizaron concertos por España, Europa e América, destacando o ciclo Sicut Sagittae de Nápoles, Noites nos xardíns do Real Alcázar de Sevilla, o Festival de Torroella de Montgrí, o ciclo Suena la Cúpula del Centro Niemeyer de Avilés, o ciclo Marcos Históricos do Festival Internacional de Santander, o ciclo de concertos do Museo do Greco en Toledo, a tempada de concertos do CaixaForum de Barcelona, o Festival Internacional de Arte Sacra de Madrid (FIAS) ou o Festival Internacional de Música Sacra do Teatro Sucre de Quito, Ecuador. En febreiro de 2021, Patrimonio Nacional publicou o documental Stradivarius 1700. Un soño real sobre a historia do violonchelo da colección do Palacio Real de Madrid, protagonizado por Pérgamo Ensemble xunto á soprano Eugenia Boix.

Por outro lado, os seus membros forman parte de agrupacións nacionais e internacionais como The Academy of Ancient Music, a Orquestra Barroca Catalá ou Nereydas e tocaron con asiduidade con solistas da altura de Gilles Colliard, Eugenia Boix, Christophe Coin, Manfredo Kraemer ou María Hinojosa.

Pérgamo Ensemble é unha agrupación versátil que ofrece propostas que abarcan dende os programas puramente instrumentais ata proxectos con solistas nacionais e internacionais de recoñecido prestixio. Ademais, no seu catálogo interpretativo encontramos propostas que xuntan a recuperación do patrimonio nacional inxustamente esquecido polo paso dos séculos con algúns dos autores máis laureados dos séculos XVII e XVIII.

 

Mater Misericordiae

Trala morte de Jan Dimas Zelenka en decembro de 1745, o seu bo amigo Johann Georg Pisendel, o virtuoso violinista co que traballou facendo bo xugo na corte de Dresde, tratou de publicar con axuda de Georg Philipp Telemann os 27 responsorios do compositor checo. Aínda que nunca conseguiron acometer a tarefa, o mero feito de intentalo demostra a profunda admiración que os músicos tiñan por un dos autores máis prolíficos do período barroco.

O Salve Regina ZWV 204 foi escrito en torno ao ano 1720 para unha inusual formación consistente en soprano, violín, óboe e baixo continuo. Unha década despois, reutilizou o mesmo material para elaborar unha segunda versión orquestral. Zelenka deixou un asombroso catálogo de música relixiosa sobre a que entregou a súa enorme capacidade contrapuntística.

A cantata Zeug, ohn Verzug, in deinen Nöten de Telemann foi concibida para o quinto domingo despois da pascua entre os anos 1731 e 1732, con idéntica formación que o Salve Regina de Zelenka.

Completan o programa dúas pezas instrumentais dos dous autores. A Trío sonata TWV 42:g5 pertence á colección Essercizii musici que Telemann compuxo para unha gran variedade de instrumentos con diferentes combinacións. A Sonata ZWV 181 pertence a unha colección de tríos para dous óboes escritos por Zelenka a principios da década de 1720, entre as que unha delas ten a particularidade de que foi concibida para óboe e violín.